न्यूज अभियान
हरेक खबर विशेष खबर

महेन्द्रनगर, २९ असोजः सुदूरपश्चिम विश्वविद्यालयले रिक्त रहेका विभिन्न सङ्कायका डीन, केन्द्रका निर्देशक तथा केन्द्रीय क्याम्पसको प्रिन्सिपललगायत पदाधिकारी नियुक्त गरेको छ ।
    
कञ्चनपुरको महेन्द्रनगरस्थित सुदूरपश्चिम विश्वविद्यालय केन्द्रीय कार्यालयअन्तर्गत पदाधिकारी सिफारिस समितिले सूचना जारी गर्दै दश दिनभित्र नौ सङ्कायका लागि डीन, केन्द्रीय क्याम्पसका लागि प्राचार्य तथा भाषा, साहित्य तथा संस्कृति केन्द्र र अन्तरराष्ट्रिय सम्बन्ध केन्द्रका लागि निर्देशक पदका लागि असोज पहिलो साता आवेदन खुला गरेको थियो ।

विश्वविद्यालय कार्यकारी परिषद्को बुधबारको पदाधिकारी सिफारिस समितिको सिफारिसका आधारमा खुला प्रतिस्पर्धा र छनोटका विभिन्न चरणपछि यहाँ पाँच सङ्कायका डीनसहित पदाधिकारी नियुक्त गरिएको सुदूरपश्चिम विश्वविद्यालय केन्द्रीय कार्यालयका सूचना अधिकारी नवीन बमले जानकारी दिनुभयो ।
    
उहाँका अनुसार विश्वविद्यालयको व्यवस्थापन सङ्कायको डिनमा प्रा डा शिवप्रसाद सापकोटा, शिक्षाशास्त्र सङ्कायमा प्रा डा नाथुराम चौधरी, विज्ञान तथा प्रविधि सङ्कायमा प्रा डा प्रेमसिंह साउद, स्वास्थ्य विज्ञान सङ्कायमा प्रा डा डबलबहादुर धामी र मानविकी तथा सामाजिक शास्त्र सङ्कायमा प्रा डा राजेन्द्रप्रसाद भट्टलाई नियुक्त गरिएको छ ।
    
त्यसैगरी, विश्विद्यालयको अन्तरराष्ट्रिय सम्बन्ध केन्द्रको निर्देशकमा प्रा डा महेन्द्रराज जोशी, भाषा साहित्य तथा संस्कृति केन्द्रको निर्देशक प्रा डा हरिशचन्द्र भट्ट र विश्विद्यालयको केन्द्रीय क्याम्पस (प्रिन्सिपल)मा डा दीपकचन्द्र भट्टलाई नियुक्त गरिएको विश्वविद्यालयले जनाएको छ ।