न्यूज अभियान
हरेक खबर विशेष खबर

काठमाडौँ, ११ कात्तिकः जर्मनीको आर्थिक सहयोग तथा विकाससम्बन्धी सङ्घीय मन्त्रीका संसदीय राज्यसचिव डा बार्बेल कोफ्लर चारदिने नेपाल भ्रमणका लागि आज यहाँ आउँदै हुनुहुन्छ ।

    नेपालमा रहँदा राज्यसचिव डा कोफ्लरले जर्मनी–नेपाल सहकार्यको विस्तृत जानकारी लिनुका साथै महिला अधिकार र स्वास्थ्य तथा भोटेकोशी बाढीको प्रभावसम्बन्धी विषयमा ध्यान केन्द्रित गर्नुहुने यहाँस्थित जर्मनी दूतावासले जनाएको छ । उहाँले नेपाल सरकार, नागरिक समाज तथा अन्तरराष्ट्रिय र स्थानीय साझेदारका प्रतिनिधिहरूसँग भेटघाट गरी जर्मनी र नेपालबीचको विकास सहकार्यलाई अझ सुदृढ बनाउने विषयमा छलफल गर्नुहुनेछ ।

    जर्मनीको सङ्घीय सरकारले भोटेकोशी बाढीको प्रतिकार्यका लागि एक करोड १० लाख ६१ हजार युरो सहयोग उपलब्ध गराएको छ । उक्त सहयोग तत्काल मानवीय सहायता सञ्चालनका साथै प्रभावित क्षेत्रमा स्वास्थ्य तथा ऊर्जा पूर्वाधारको आपूर्ति र पुनर्निर्माणका लागि दीर्घकालीन विकास सहयोगमा खर्च गरिनेछ ।

    बाढीका परिणाम र प्रभावित क्षेत्रको मानवीय अवस्थाबारे जानकारी लिन राज्यसचिव डा कोफ्लरले नुवाकोटको भ्रमण गर्नुहुनेछ । भ्रमणका क्रममा उहाँले स्थानीय सरकारका प्रतिनिधि, स्वास्थ्यकर्मी तथा प्रभावित नागरिकसँग अन्तक्र्रिया गरी स्थलगत रूपमा मानवीय सहायता र पुनःस्थापनाका आवश्यकताबारे जानकारीसमेत लिनुहुनेछ ।

    काठमाडौँमा राज्यसचिव डा कोफ्लरले जर्मन विकास सहयोगबाट समर्थित स्थानीय स्वास्थ्य संस्थाहरूको भ्रमण गर्नुहुनेछ । साथै, उहाँले स्वास्थ्य क्षेत्रका सरकारी तथा नागरिक समाजका प्रतिनिधिहरूसँग छलफल गर्नुहुने बताइएको छ । यसका अतिरिक्त, उहाँले नेपालका वर्तमान तथा भावी विकासक्रम र चुनौतीहरूबारे विस्तृत जानकारी लिन विभिन्न छलफलमा सहभागी हुनुहुनेछ । ती छलफलमा गत वर्ष भएको जेनजी आन्दोलन तथा नेपालमा सङ्क्रमणकालीन न्यायका विषय पनि समेटिनेछन् ।
 
    यस क्रममा राज्यसचिव डा कोफ्लरले विकास सहकार्यका सबै तहबाट विभिन्न दृष्टिकोण बुझ्ने अवसर प्राप्त गर्नुहुनेछ । त्यसैले यो भ्रमण जर्मनी र नेपालबीच लामो समयदेखि कायम रहेको विकास सहकार्यमा महत्त्वपूर्ण हुने अपेक्षा गरिएको छ । 

    राज्यसचिव डा कोफ्लर सन् २००४ देखि जर्मन संसद्को सदस्य हुनुहुन्छ । उहाँ सन् २०२१ देखि आर्थिक सहयोग तथा विकाससम्बन्धी सङ्घीय मन्त्रीका संसदीय राज्यसचिवका रूपमा कार्यरत हुनुहुन्छ । यस भूमिकामा उहाँले जर्मनीको द्विपक्षीय तथा बहुपक्षीय विकास नीतिसम्बन्धी सहकार्यको समन्वय र कार्यान्वयनमा मन्त्रीलाई सहयोग गर्दै आउनुभएको छ ।

    राज्यसचिव डा कोफ्लरले यसअघि सन् २०२२ मा पनि नेपालको भ्रमण गर्नुभएको थियो । त्यस क्रममा उहाँले नेपालका विभिन्न साझेदारसँग छलफल गर्नुभएको थियो । यस वर्षको भ्रमणले दुई देशबीचको सहकार्यलाई थप सुदृढ बनाउने र विगतका प्रयासलाई निरन्तरता दिँदै अघि बढ्ने अवसर प्रदान गर्ने बताइएको छ ।