न्यूज अभियान
हरेक खबर विशेष खबर

आपराधिक समूहसँग जोडिएका हिंसात्मक घटनाहरू बढेपछि कोलम्बियाका राष्ट्रपति अबेलार्डो डे ला एस्प्रियेलाले भेनेजुएलासँग सीमा जोडिएको कुकुटा सहरमा अस्थायी रूपमा सेना परिचालन गर्न आदेश दिनुभएको छ ।

    नोर्ते डे सान्तान्देर विभागको राजधानी कुकुटामा पछिल्ला केही दिनयता मेयर पदका उम्मेदवारको हत्या हुनुका साथै बम विस्फोटमा चार प्रहरी अधिकारी घाइते भएका छन् । स्थानीय सरकारका अनुसार यी घटनापछि सहरको सुरक्षा अवस्था तनावपूर्ण बनेको छ ।

    राष्ट्रपति डे ला एस्प्रियेलाले सार्वजनिक व्यवस्था सामान्य अवस्थामा फर्काउन कुकुटामा तत्काल सेना परिचालन गर्न निर्देशन दिनुभएको हो । उहाँले सार्वजनिक सुरक्षा अवस्था स्थिर भएपछि यो व्यवस्था हटाइने स्पष्ट पार्नुभएको छ ।

    यस आदेशसँगै सहरमा प्रहरी तथा सैनिक कर्मचारी परिचालन गरिनेछ । गत अगस्ट ७ मा पदभार सम्हालेयता राष्ट्रपति डे ला एस्प्रियेलाले यस्तो कदम चालेको यो दोस्रो पटक हो । यसअघि लागुऔषध तस्करीमा संलग्न समूहले व्यवसाय तथा सवारीसाधनमा हिंसात्मक आक्रमण गरेपछि लोकप्रिय पर्यटकीय गन्तव्य सान्ता मार्ता सहरमा पनि सेना परिचालन गरिएको थियो ।

    कोलम्बिया र भेनेजुएलाबीचको दुई हजार २०० किलोमिटर लामो सीमावर्ती क्षेत्रमा लागुऔषध तस्करी, अवैध खनन तथा अन्य तस्करीमा विभिन्न सशस्त्र समूह संलग्न छन् । तीमध्ये विघटित फार्कका असन्तुष्ट सदस्य र नेसनल लिबरेसन आर्मी (इएलएन) पनि रहेका छन् ।

    कोलम्बियाका सशस्त्र समूहविरुद्ध कडा कारबाही गर्ने प्रतिबद्धतासहित पदभार सम्हाल्नुभएका राष्ट्रपति डे ला एस्प्रियेलाले त्यसयता देशभर बम विस्फोट तथा सुरक्षा निकायका स्थलगत कारबाही बढाउँदै आउनुभएको छ ।